ضباط السينما المصرية.
كتير مننا يعرف ان احمد مظهر كان ضابط جيش ، لكن مش كتير يعرف ان صلاح ذو الفقار كمان كان ضابط بس ضابط شرطة ..
الاتنين قدموا استقالتهم ، و خدموا بلدهم بردو من خلال السينما .. ازاي ؟ .. تعالوا نعرف الحكاية
* نبدأ بالشاب الوسيم صلاح ذو الفقار ..
صلاح اتخرج من كلية البوليس سنة 46 ، في بدايته اتعين في مديرية امن المنوفية و اشتغل فترة فيها ، و بعدين اتنقل لمصلحة السجون ، و تحديدا ( سجن مصر ) ، و بالمصادفة كان مسجون وقتها الرئيس الراحل انور السادات ، كان مسجون سياسي في عهد الملك و صلاح ذو الفقار كان الضابط المسؤول عن السجن في الوقت ده .. صلاح كمان كان ليه دور في المقاومة وقت العدوان الثلاثي سنة 56 ، و اتكرم عن دوره ده من الرئيس جمال عبدالناصر ، سنة 55 اقنعه اخوه عزالدين انه يدخل السينما ، فقدم صلاح طلب لوزارة الداخلية بانهم يسمحوا له بالتمثيل ، و على عكس توقعاته ، الطلب اتقبل و شارك باول أفلامه ( عيون سهرانه ) مع شادية و هو على ذمة الشرطة ، الفيلم نجح و انعرض على صلاح ادوار كتير فقرر يستقيل بشكل نهائي من الشرطة و يتفرغ للسينما ..
* احمد مظهر ..
مظهر كان ضابط جيش و كان دفعة الرئيس جمال عبدالناصر و صديقه ، كمان كان واحد من الضباط الأحرار ، لكن وقت قيام الثورة كان في مأمورية خارج البلد ، فماكملش للنهاية معاهم ، كمان مظهر شارك في حرب فلسـ،طين سنة 1948 ... بداية مظهر مع السينما كان و هو لسه ضابط بردو ، فاترشح لدور في فيلم ظهور الاسلام ، و عمله و هو على ذمة الجيش بعدها اتعرض عليه ادوار تانية ، و لما زادت عليه الأدوار ، قرر مظهر سنة 1956 يتخلى عن بدلته العسكرية و أصبح بعد كدا فارس السينما المصرية و من اهم النجوم اللي قدمتهم السينما ..
هل كدا انتهى دورهم الوطني ؟ .. لأ
مظهر و صلاح بعد استقالتهم شاركوا في أفلام بتدعم ثورة 52 و بتحارب الـ،طبقية و النظام الإقطاعي بتاع الملك .. زي فيلم ( رد قلبي ) اللي كان بيدعم الثورة و بيحارب الملكية ، كمان الاتنين اتقابلو في فيلم ( الأيدي الناعمة ) اللي بردو كان بيدعم ثورة 52 و بيحارب الفكر الاقطاعي ، و بيدعو للعمل وقدموا لثوره الجزائريه فيلم
جميله بوحيرد ..
صلاح و مظهر صحيح قدموا استقالتهم لكنهم كانوا داعمين لزملائهم للنهاية ..
رحمه الله عليهم كانوا عمالقه